其實本來唔打算分開兩篇寫,但係唔知點解響Yahoo! Blog 佢自己腰斬咗我篇野的內容,唯有分開啦!
第3天(Sat, 29th):早餐:酒店早餐>早:Let's Relax>午餐:姐娥>午:Big C & 林真香>晚餐:Blue Elephant>宵夜:芒果糯米飯
呢晚晚飯去食傳統泰菜,屬於高消費架!餐廳係響個度長住的朋友介紹的,但係佢有異性無人性咁甩咗我哋底,搞到食飯四個人變二個(講笑啫,其實佢哋真係有事唔黎得^^”)。唔理,照去!但係少咗兩個人真係有D問題,之後講點解。
Blue Elephant
地址: 233 South Sathorn Road, กรุงเทพมหานคร 10120
電話:+66 2 673 9353
開放時間:午餐: 11:30-14:30, 晚餐: 18:30-22:30
交通:坐BTS到Surasak
衣著:Smart Casual
講起Blue Elephant 大家都會知道佢好出名,幾乎每本旅遊書都會介紹。不過通常係介紹佢的烹飪班,認真唔平架。雖然唔平,但係質素有保證的,所以就算唔學煮,黎齋食下傳統泰菜都好好。
入到去招呼好殷勤!大讚!呢度的佈置都好Grand 下,同埋幾舒服,而且好有特色,有好多相片同畫,裱框仲好有泰國特色添。Reception 帶我哋去咗間房仔,有4、5枱左右,但係無論係大廳定房仔都唔會太迫,感覺幾好,唔會覺得講乜野隔離枱都聽到曬。
睇住個餐牌就知道淨係得我哋兩個真係唔掂檔,因為大部分的菜色都有隻紅色象仔響隔離,即係辣架!對於唔食辣的懶蟲黎講,選擇無幾呀!
所以我哋放棄咗揀set menu,雖然敗家仔叫D嘢都差唔多係一個set 勒
睇返普通的Menu,餐廳將菜色分成三種Thai Cooking of the Past, Thai Cusine of Today, 同 Thai Kitchen of Tomorrow,咁即係傳統泰菜,今日食開的泰菜,同創意泰菜啦!
- Pearls of Blue Elephant Thai Cusine of Today的小食併盤 一隻辣椒
- Massaman Lamb 一隻辣椒
- 木瓜沙律 兩隻辣椒
- 冬陰功 三隻辣椒
有無發覺好多都係炸野?我最欣賞反而係個沙律,佢係甜甜地的,又有D酸酸地喎,個味道係超開胃!唔講都知佢係頭盤呀,完全發揮咗佢響呢餐飯應有既作用!
然後就上咗冬陰功同個羊。先講俾懶蟲食的羊,佢放響個陶煱放響爐仔上面暖住,大家慢慢食都唔怕會凍。啱啱上枱好似羅宋湯咁既樣,但係其實佢個汁係好似沙嗲、咖喱一類咁既汁,有少少辣,但係完全係可以接受到的程度,仲有D甜甜地,好香。
淨係少少羊係咪唔飽?唔緊要,有得配埋飯,仲有兩種,我揀咗白飯,侍應仲好熱心咁叫我不如兩樣都試下。順便俾大家揀真下個汁係咩樣。因為呢個汁太香,我買咗一包返屋企。
到冬陰功勒。話明食傳統泰菜真係唔同D,點唔同?特別辣!敗家仔話同早兩晚個個無得比。辣得黎佢的味道都好豐富無偷工減料架!恕懶蟲真係無辦法試清楚D,因為佢的辣度係有三大隻辣椒!三隻辣椒已經好辣佢的辣度真係唔係隨便寫上去。
仲記得敗家仔點咗個木瓜沙律嗎?就係呢個勒,配糯米飯食。呢個對懶蟲都係太辣,敗家仔一個人試完曬一隻、兩隻同三隻辣椒,Comment 就係每多一隻辣椒都真係試得出同少一隻係兩個程度黎。食三隻辣椒的冬陰功都辣到飛起,其實佢仲有四隻辣椒的餸菜架,Set 入面都有,真係唔知點食得入口,叫之前要三思呀!
有無發現仲差D咩呢?咪就係甜品!呢日已經係響曼谷的最後一晚,當然要去食芒果糯米飯。
沒有留言:
發佈留言