響大家睇到呢篇文的時候，懶蟲已經唔係香港喇！因為又出發去玩！上次的遊記都未寫完又去玩，好底線！其實曼谷Trip 好似係半年前的事... 我知我懶，所以病咗都爬起身寫埋呢篇遊記先出發。唉，我Ｄ感冒可唔可以快Ｄ好，病咗點學人地去玩呀？！最緊要係仲有好多野食等緊我架嘛！
第3天(Sat, 29th)：早餐：酒店早餐＞早：Let's Relax＞午餐：姐娥＞午：Big C & 林真香＞晚餐：Blue Elephant＞宵夜：芒果糯米飯
話說之前響T21 行街街，其實呢個唔係重點，純粹要黎Kill Time，因為下一個行程又係食嘢。
姐娥
地址：68/2 Sukhumvit 20, Khlong Toei, Bangkok
電話：662-258 8008
開放時間：10:00-22:00
交通：坐BTS到Asok,行20分鐘左右
左度右度終於安排到黎呢度食蟹。呢間野個位置話近唔近話遠又唔算好遠，不過曼谷咁曬咁熱，響T21行過黎都有D身水身汗。仲要對住個地圖都搵唔到，真係有Ｄ躁底！後尾發現原來響隔離街，google map 都唔係完全啱架，大家真係要執生。
黎到會先經過停車場，所以唔留意好易會miss 咗。可能因為晏奏無咩人，又或者話呢度實在太大，搞到望落去好似無咩人。中間有個好大的廳，我哋就坐響呢圓圈出面個Ｄ走廊位，但係其實最大個圈係房黎架！Ｄ房有Ｄ大屏風遮住，好有中國特色。姐娥係有分店架，好似話呢間裝修就靚Ｄ，不過野食就無咁有水準。入度黎成個感覺其實好遊客餐廳，連黎食野Ｏ既人都係遊客。
餐牌圖文並茂，有英文添，唔怕點唔到餸。
一睇就知主打Ｄ咩，蟹囉！淨係蟹都有咁多款
一睇就知主打Ｄ咩，蟹囉！淨係蟹都有咁多款
行到熱辣辣，有咩好得過飲返支冰凍的汽水？唔好講咁多，即刻黎返支
揀咗咖喱蟹，但係食落一Ｄ都唔咖喱，同埋唔會好多汁，因為落咗好多蛋去炒，成碟食起黎似蛋炒蟹。幾好食，但係唔算好驚喜，懶蟲都係鐘意新加坡Ｄ辣蟹多Ｄ。
蝦餅係另一味招牌菜。呢個唔錯，咬落都仲有Ｄ蝦粒，幾有口感，同埋最緊要食落唔會太油，配埋個甜酸汁就最正。不過就嫌佢薄咗Ｄ，唔認真食都食唔出中間Ｄ蝦膠。
懶蟲食飯慣咗要有菜，所以都炒咗碟。呢個好似好普通，但係佢整得好好食
仲有一味，黎曼谷一定會叫的，就係生蝦刺身。呢味餸真係要推介，不過又唔一定要響呢度食，一般食都唔會差，配埋個辣椒汁好好味！不過我就唔鐘意生蒜片，嫌佢辣。
整體黎講呢餐都唔錯，如果以遊客地方黎講，佢Ｄ餸都算大碟架喇！不過可能懶蟲要求高，又唔覺佢好驚喜喎！
食飽就係時候行下，咁熱梗係去Ｄ有冷氣Ｏ既地方行。所以就去咗Big C掃貨啦！
Big C 係其中一個大家去曼谷都一定要去報到的地方，為的當然係入面包羅萬有的零食同日常用品。日常用品對於我同敗家仔黎講就真係無乜吸引力喇！我哋淨係關心野食。一如之前講，其實如果好似我哋淨係打算買Ｄ熱門嘢做手信同返屋企過下口癮唔使特登行過黎都得，我哋最後都係買咗Ｄ百力滋，公仔麵，魷魚，紫菜咁，呢Ｄ響好多遊客區的零食專賣店都有齊曬。
之後仲有另一個Check point 的，就係林真香。買咗好多肉鬆製品，肉鬆蝦片好吸引。不過豬肉脆條就賣曬勒，搞到最後都淨係可以買到另一個「老翻」林真香的。但係好推介大家試下個豬肉脆條，味道幾好。
我哋Ｄ戰利品就係呢堆勒，查實真係好收斂。哈哈。有無發覺右下角有Ｄ唔係嘢食？係懶蟲響離開Big C 個陣見到Oriential Princess 入去買的，佢無Boots 咁吸引，價錢都有少少貴，所以都係買幾樣咋。我覺得大家都可以試下支潤唇膏，草本成份，陣味好特別，雖然唔係好討好，但係佢幾潤同埋唔會黐笠笠。
折返酒店放低Ｄ嘢都晏，所以就放棄咗瞿道瞿的行程，直接去食晚飯。
