雪嶺流螢: 聖誕曼谷遊 2012

本來懶蟲應該要搵多D台中旅行的資料同學習下用部新相機，但係見咁耐都唔寫下Blog，好似唔係好應該…咁就繼續寫返寫極都唔完的遊記先。對唔住，無鴨仔喎，都無Ironman囉～

第3天(Sat, 29th)：早餐：酒店早餐＞早：Let's Relax＞午餐：姐娥＞午：Big C & 林真香＞晚餐：Blue Elephant＞宵夜：芒果糯米飯

上一篇：聖誕曼谷遊2012 - 第二天 (3)

落樓下食早餐，以為尋日早咗瞓，呢日會早啲但係搞下搞下都同尋日差唔多。仲要雖然好快就食飽咗，但係食完都遲咗些少，即刻搭lift 去6樓做spa。無錯！連續兩個Spa。Let’s Relax 係T21呢間酒店的Spa，所以可以坐酒店Lift，都算係一個賣點。有另一Pair 香港人同我哋Book 咗同一個時間，仲一齊搭lift 去做Spa。坐住客專用Lift好似好威，但係其實係要… 要…要… 走後門!!!

Let’s Relax Spa

網址： http://www.letsrelaxspa.com/

地址：6th Floor Hollywood Terminal 21 Shopping mall 2, 88 Sukhumvit Soi 19 (Wattana) Sukhumvit Road North Klongtoei, Wattana, Bangkok 10110

電話：02-108-0555 , 02-1080518-19

開放時間：10:00 – 00:00 Midnight

費用：Golfers’ Heaven（135分鐘，2400THB）

交通：坐BTS到Asok, T21商場內

職員帶我哋由後門行返出Reception，沿路會經過Ｄ房。雖然影唔到相，但係其實我都幾鐘意佢Ｄ走廊，黑就黑Ｄ，但係佢放Ｄ燈仔響地下，幾靚幾好Feel。坐低之後又係指定動作：換拖鞋，飲Welcome Drink，揀油同磨沙膏。Welcome Drink D顏色有無好似曾相識，懶蟲懷疑係之前響Food Court 飲過的不知名物體，但係就算飲第二次，依然搞唔清楚係Ｄ咩:P

呢度係Book 的時候除咗要揀做咩Spa，仲要俾埋錢。所以黎到真係嘆世界架咋～懶蟲因為之前做scrub磨爛腳，所以手手腳腳乾到爆既我都係做wrap就算。本來懶蟲有諗過直情Skip 咗唔到Scrub，但係始終都係要等埋敗家仔，咁就大家一齊做Golfers’ Heaven。

油揀咗邊隻真係唔多記得，淨係記得有隻油佢讀咗兩三次我都聽唔到係乜，我諗應該最後都係揀咗薰衣草或者香茅。至於嗰啲一碟碟係磨沙膏，唔關我事，係俾敗家仔揀架。淨係最右邊嗰碟先係我揀得的。嗚？點解咁大細超架，我淨係可以二揀一，好啦，揀咗蘆薈。查實我覺得個黑mud mud的芝麻好得意，但係敗家仔無揀到。揀好就可以去Spa 房～

房其實都幾大，唔計浴室應該仲闊落過尋晚嗰度。同埋佢個鐘好大個，大家要Check 鐘就方便啦！

另一邊就有個架同夾萬仔，唯一差Ｄ既就係唔夠衣架掛衫。入房換完衫，開門，嗰兩個姐姐唔見咗？佢哋又話響門口等我哋？

左望右望都無人，唯有等下。等咗陣佢哋入返黎，原來有些少溝通不良，佢哋expect我哋換完衫會沖一沖身先，唔怪得之無咁快返黎。咁就開始做Spa，幫我做Spa個姐姐識講一啲廣東話單字。捽咗陣，我就成身都係蘆薈油，粒黐黐咁，仲係咁話凍，雖然姐姐話做Wrap會比做Scrub凍啲，但係我真係頂唔順，所以佢幫我開咗暖氈。然後好快我就好似等緊入焗爐嘅魚咁被人包住咗><，佢會幫我輕輕按下腳同頭，之後我就齋等。

做Scrub 的敗家仔係搞得耐啲，而且佢嗰邊仲有意外發生咗，就幫佢個姐姐打爛咗碟磨沙膏！手忙腳亂清理好同繼續磨埋之後，我哋兩條友都要攤響度等。查實等到呢度，我覺得有啲痕，都不知幾想快啲可以去洗返乾淨。敗家仔的comment呢？佢話覺得人哋捽得求其咗啲喎～

無幾耐姐姐就入返黎叫我哋去沖身。然後有杯薑茶，甜甜地，最重要係我飲完終於暖返曬！！！咁跟住就精油按摩，好舒服，不過好似按完都未覺得好鬆，但係就唔會出力過頭唔舒服。但係敗家仔又話佢覺得呢度按得好過之前嗰晚，所以呢Ｄ嘢都係睇自己覺得。

本來我仲諗住做乜無咩點按腳，你知啦，去旅行行埋行埋咁多路，最緊要的（乜你有行好多路咩？）！原來有原因架！因為佢哋幫我哋按摩完，我哋要換返衫去第二間房做腳部按摩，咁就會按到腳板同小腿，其實我都係鐘意按小腿多Ｄ～

享受完就可以出返reception，享受呢度另一個Selling point，就係芒果糯米飯甜品。佢都幾好味架！唔好睇少佢！不過食緊嗰陣，下一round 的女顧客有些少發爛渣。雖然唔知詳細情況，但係睇個樣都係Ｄ小問題，可能啱啱忙Ｄ，安排得唔好，等得耐咗。不過咁，比較起Divana Virtue Spa，呢度的Service係無咁好，裝修亦都簡約Ｄ。如果俾我揀，我會黎呢度，因為雖然係無咁好，但係都好唔錯啦，同埋佢真係平Ｄ，我寧願俾人按多幾個字，仲要地點咁方便。