聖誕曼谷遊 2012 - 第二天 (3)

翻睇返遊記發現有個問題，就係點解我上篇同上上篇個開場白係一樣架呢？！

第2天(Fri, 28th)：早餐：酒店早餐＞早：大皇宮+玉佛寺＞午：卧佛寺＞午餐：Siam Paragon Food Court＞午：Central World＞晚餐：水門雞飯＞晚：Divana Virtue Spa

上一篇：聖誕曼谷遊2012 - 第二天 (2)

黎曼谷又點可以唔做spa 呢? Research 完一輪，今次我哋揀咗兩間價位比較高的Spa 試下。

第一間就係Divana Virtue Spa，呢間響Surasak 附近。Divana 期下查實仲有幾間，我哋都有諗過去Thong Lo 個間，近Ｄ。但最後都係費事搞咁多嘢。

Divana Virtue Spa

網址：http://www.divana-dvn.com/

地址：10 Srivieng, Silom, Bangrak, Bangkok 10500 Thailand

電話：+66 (0) 2630-0499, +66 (0) 2636-6788-9

開放時間：10:00 (週末) / 11:00 - 23:00 (最後預約 21:00)

電郵：dv@divana-dvn.com

費用：Aromatic relaxing massage（90分鐘，1650THB） 

交通：坐BTS到Saphan Taksin站下車再走過去

呢間Spa 真係貴架，所以就算佢幾乎長期都有Promotion（黎呢度黎下有無啱）

我哋都係揀咗個短的treatment。呢度似乎推油比較出名所以aromatic relaxing massage（90分鐘，1650THB）

因為Book 咗8點半，所以食飯咁早。出咗地鐵站行唔係好遠就到，官網有地圖。不過條路都有少少黑，如果淨係一班女仔都係小心Ｄ好。

原來有另一班香港人同我哋一樣Book 咗呢個時間，佢哋好似係一家人黎。

講返Divana Virtue Spa，其實佢最出名的......係靚！

見到呢個大招牌就轉入去啦！

  

會見到個花園仔，仲有水池添！不過太黑唔係好影到相

 

黎到門口就要除鞋換拖鞋

然後姐姐就會Confirm 返要做的spa (Book嗰陣當然要講埋，不過就唔使俾錢住)

最近門口個房係收銀處，同埋有個大櫃放曬D唔同的spa 產品

因為擺得太漂亮了，多拍了好幾張。包裝都好公主Feel～

還有禮盒裝，同樣長期有優惠，可以考慮買一些做手信。一樣成日有Ｄ優惠Coupon

  

店員帶我們坐在裏面的大廳等

咦？旁邊呢個係？　好大的一個梳妝枱！！

 

上面都放滿自家產品，歡迎試用～～～

也有其他的擺設，一整個店都走歐陸風格

   

先喝Welcome Drink，仲有冰毛巾

 

等咗好一陣，終於見店員捧咗盤按摩油俾我哋揀味。Ｄ樽仔配合埋Ｄ按摩油顏色真係靚到爆，放磨沙膏的瓷盒一樣係好精緻

懶蟲都唔係好記得自己揀咗Ｄ咩油，好似係Lemongrass同薰衣草其中一樣，因為其他可能因為唔知咩味，總係覺得怪怪哋 

揀好咗，Mark 低埋邊Ｄ位要出力，邊Ｄ位唔好按，店員就帶我哋去房換衫

房Ｄ相影得黑咗啲…間房都幾大，一邊係床，對面就係枱仔同椅。


枱面有個好挸的鐘，不過如果想睇住佢Check 下姐姐有無扼你鐘可能有Ｄ難，因為太細。懶蟲份人無乜時間觀念，佢啱我鐘我從來都唔知。齋睇都知一陣姐姐會響度幫我哋洗腳。

入面另外有一個好大的浴室，如果大家有揀埋浸花花浴，呢個大浴缸就會用得著。浴室一樣係好歐陸Feel，塊大鏡都係花邊

 

換出黎的衫可以掛響度，門口隔離就另外有張細枱放袋

按摩都幾舒服，力度都夠，行完一日路，按完真係會鬆咗。勁想按耐Ｄ!!! 不過好似幫敗家仔按個姐姐仲好Ｄ，因為識得響Ｄ好緊的位置幫佢加多兩錢肉緊出力按（按緊的時候應該真係會幾痛 ^^”）。

話咁快就按摩完，沖身換衫。兩人房就有呢個唔好，要等沖涼。等唔係問題，只係等的時候因為仲成身油真係有Ｄ凍。沖涼用的洗頭水，護髮素，沐浴露，以至Lotion 等等當然係一條龍的自家製Product～大家不妨試多Ｄ

出返黎有生果食，真係唔錯。但係姐姐好快就消失咗… 本來仲諗住俾小費

 

趁無人，等我補影返頭先有人坐的大廳先。

 

係咪好靚先？如果日頭黎應該仲靚

 

轉個頭另外個班人都做完，佢哋應該多ＤTreatment架噃，咁快？唔通我哋兩個真係太姿整？搞掂曬就打道回府，因為懶所以無去買芒果糯米飯食而返咗酒店。咁又過咗一日喇！

呢度真係幾唔錯，不過價錢真係貴的。貴響邊？就係裝修同Service，去埋之後個朝的Let’s Relax 就感受到

第二日的開支小結：

日期	項目	泰銖
28	BTS: Saphan Taksin	80
	船飛（大皇宮）	30
	大皇宮門票	800
	卧佛寺門票	200
	船飛（Central Pier）	80
	BTS: Siam	60
	Food Court: 豬手飯	65
	Food Court: 湯粉	60
	Food Court: 芒果糯米飯	30
	Food Court: 飲品	70
	Wacoal	1815
	海南雞飯	100
	BTS: Saphan Taksin	60
	Divana Virtue Spa	3656
	BTS: Asok	70
	水＆小食	105

聖誕曼谷遊 2012 - 第二天 (2)

已經好耐無update 個blog... 仲話起碼一個星期要update 一次

寫遊記真係要打鐵趁熱，時間耐左，真係開始唔記得，就會覺得寫唔出字了。第二日嘅行程係行得最攰嘅，觀光日。背景資料亦唔寫太多，又悶又要花很多時間搜集資料。但係咁，剔除開背景資料又好似無咩內容，大家就睇下相算啦。

第2天(Fri, 28th)：早餐：酒店早餐＞早：大皇宮+玉佛寺＞午：卧佛寺＞午餐：Siam Paragon Food Court＞午：Central World＞晚餐：水門雞飯＞晚：Divana Virtue Spa

上一篇：聖誕曼谷遊2012 - 第二天 (1)

行完大皇宮，敗家仔貪得意無按原路走回碼頭，而是走到皇宮的另一邊。這一帶沿路有賣各式各樣物品的地攤，有衣服、鞋、皮帶、飾品、書、梳等等，當中仲有不少賣佛牌的檔攤。


懶蟲想買Ｄ俾屋企人，不過花多眼亂，而且似乎各花入各眼，當地人都自己揀，好壞沒有一定的標準。懶蟲這些外行人，不怕買貴只怕買錯，咁就無謂。有研究的朋友可以黎下尋寶。

曼谷卧佛寺 Wat Pho

網址：http://www.watpho.com/en/home/

地址：Sanam Chai Road and Maharaj Road

電話：662 225-9595

開放時間：08:00-17:00

費用：100B 

交通：坐BTS到Saphan Taksin站下車走到碼頭Central Pier轉船到N8 Tha Tien 再走過去

＊穿著要求：裙或褲要遮過膝蓋，上身不能露出肩膀和腰，不能穿拖鞋

曼谷卧佛寺維基百科：http://zh.wikipedia.org/wiki/%E5%8D%A7%E4%BD%9B%E5%AF%BA_(%E6%9B%BC%E8%B0%B7)

行行下就黎到卧佛寺門外，懶蟲就拉著本打算前往碼頭的敗家仔去卧佛寺逛逛。其實呢，懶蟲已經去過，但係都黎到門口，點都入下去啦！

去卧佛寺當然就係睇卧佛，呢座寺係其中一座泰國最古老的寺廟，有最大的卧佛像。查實呢Ｄ乜乜之最都係名黎啫，細分多幾個item 總有辦法搵到一個之最啱用。雖然咁講，卧佛真係好大，好壯觀架！

大皇宮、卧佛寺同鄭王廟都係Ｄ比較多人去的景點，所以都預咗要買飛同唔會平。其實有時間可以慢慢行都幾大的。

跟住人潮買飛入去睇卧佛。門卷有免費贈飲，係一支細凍礦泉水，都算幾照顧大家。然後就要排一排隊入去睇卧佛。雖然呢度都要除鞋但係同玉佛寺唔同，工作人員會響門口派Ｄ袋俾大家，等大家用黎拎返住自己對鞋。真係好人山人海

一入到去，淨係會見到座卧佛，幾乎去到天花板咁高，放眼望見都金光閃閃的卧佛。

 

影完佛頭，就跟住人一路行到尾。

可以留意下Ｄ窗同壁畫，不過人多就通常都唔會點花時間睇。 

近著腳的地方，會凹入去少少，大家企埋去就可以同佢黎個全身合照。不過咁多人，當然要俾Ｄ耐性等。

 

卧佛的腳板底都好特別，係用貝殼造的，上面有108尊佛。

 

卧佛的背面好似無乜野睇，但係就有Ｄ野俾大家玩下，就係添香油！


其實一入寺大家就會聽到叮叮咚咚聲，就係Ｄ人用香油錢換成銀仔，放響呢一排的罐Ｏ既聲。好似話每個都放先會比較靈，比較得到保祐，唔知幾成真喇！

 

出黎著返鞋就可以再四圍行下 

首先係出面呢個水池，有假山石像係咪好中國？響大皇宮都見過唔少有中國色彩的石像同建築。以前中國同泰國就已經貿易交流咁，所以先會有Ｄ中國嘢出現響呢度。

睇下呢個石門眉刻咗幾多中國神仙（？）就知啦！

隔離就係有幾座高尖方塔。上面又係用Ｄ色彩繽紛的花花做裝飾，佢哋真係好高，行到埋去，連佢個底座的一半都唔到，以前係點起出黎Ｏ既呢？

 

佢有介紹返呢幾座嘢，但係睇咗都唔知咩黎

響卧佛寺旁邊有間泰式按摩學校，有好多人都慕名而黎，因為佢可算係泰式按摩的始祖。大家黎到亦可以一試。 

卧佛寺泰國傳統按摩學校 WATPO Thai Traditional Medical School

網址：http://www.watpomassage.com

地址：卧佛寺內

電話：02-221-2974

費用：260 B/30分鐘

如果有留意下卧佛寺出面的走廊就會見到畫滿教按摩的公仔架啦！

 

然後隨便行下，四圍都會見到好多金佛。好似響走廊一邊，就有一大排佛像排排坐，新新舊舊都有。

 

除咗呢Ｄ，廟入面仲有坐相同立相的佛像。不過，就唔似卧佛咁大，唔可以喧賓奪主嘛！

  

呢日唔知有Ｄ乜野特別事，寺裏面都拉起好多白繩，一格一格咁。和尚仲會四圍黎下有無問題。

 

已經行到好餓的我哋去返碼頭搭船。大家認住呢個碼頭，如果搭船直接黎卧佛寺就係響呢度落船。

 

餓到肚都扁！我哋返番去Siam，然後去咗大家都好推介的Siam Paragon Food Hall。

Siam Paragon Food Hall

網址：http://www.siamparagon.co.th/index.php

地址：991 Siam Paragon Shopping Center, G/F

交通：BTS Siam 站

首先買張儲值卡先。

一定要食就係街知巷聞的豬手飯。豬手真係幾腍幾入味的，但係個汁真係一絕。不過邪惡度都係一絕，食完有排都減唔番出黎＞＜

 

仲有就黎響豬手飯旁邊的湯粉，泰國的湯粉都好好味，當然要試。

 

然後就係未出發懶蟲已經不停話要食的芒果糯米飯～大愛～～

野飲就叫咗呢兩杯，兩杯都係茶，係奶茶定綠茶就唔知，我問返負責買的敗家仔佢都話唔知。其實飲完成杯都唔係好知咩黎，不過唔難飲，甜甜哋咁。

 

嘢食幾好食，但係貫設泰國地道嘢食的特點，就黎份量少。真係一個食兩碟都得，唔怪得泰國無肥人。 

雖然已經下奏三點，但係Food Court 都仲有好多人！

 

食飽飽可以退返張卡。經過見到麥當勞叔叔，當然要影個相

 

之後見有Ｄ時間就去咗Central World
 

目的得一個，因為要去Wacoal。懶蟲響度搞咗勁耐，因為好大，又唔慣佢Ｄ擺位。有去過無去過的朋友應該都知道，真係賣得好平。如果咁啱特價的話，分分鐘同街邊貨的價錢差唔多。不過咁，懶蟲都唔可以好似預期咁掃貨，因為佢得好少款有我個碼，仲要唔平 ><。同埋講返轉頭，其實我覺得香港賣個Ｄ係質素好Ｄ的。

當懶蟲拎住戰利品離開Wacoal 的時候，已經夠鐘食晚飯。而響呢個Trip 入面行商場買野就只係得呢個時間

我哋一路向Big C的方向行，過埋橋，過埋一條車來車往馬路，就到咗登登登櫈

  

水門雞飯

地址：Soi Phetchaburi 30, New Phetchauburi Road, Makkasan, Rachatewee, Bangkok時間：11:00 - 00:00 (14:00-17:00 休息)
交通：BTS Chit Lom 站 步行10分鐘

雖然幾乎係遊客必食之選，但係眼見都有好多當地人黎食。好似坐我哋對面的一男一女，佢哋仲響度拆啱啱買的榴槤食，好在我哋兩個都唔怕陣味。

 

Menu 依家有圖，有英文，有中文。大家唔使怕唔知咗乜啦

黎個大合照～大家話分開叫雞同飯會抵Ｄ，唔理，照跟

Ｄ雞滑得黎又幾瘦，唔錯唔錯，不過就算分開叫，份量都唔多

 

食完雞飯，天都黑曬，但係其實唔係咁夜架咋，因為我哋食咗個早的晚飯，為咗之後去嘆世界！嘆世界就留番下篇先寫

依家就補幾張附近商場Ｄ聖誕相頂住檔先啦