聖誕曼谷遊 2012 - 第一天 (2)

第1天(Thu, 27th)：香港國際機場＞早餐:翠華＞曼谷蘇凡納布機場＞酒店　Check-in＞午餐：東方文華下午茶＞晚：Asiatique Riverfront＞晚飯:Baan Khanitha by the River

曼谷油雞又黎啦! 啱啱先開始，要寫完佢，真係要D時間。呢排懶蟲發現有D色情頭像出現咗響個Blog的訪客list，雖然好努力Delete，但係就好似D滋擾電話咁，杜絕唔到。佢又唔係留comment所以無得檢舉，所以唯有停咗個訪客顯示喇！其實我都好想睇下有咩人會睇我個Blog 架～

返正題先，上一篇講到出發去high個靚tea。

Post返碼頭相先，之前有提過呢個Central Pier響行程入面出現咗好多次。出咗地鐵站響左邊條樓梯落去沿路行就會到。碼頭望出去係條橋，以呢個角度，響橋右邊係公眾碼頭，之後去大皇宮就要響呢度坐船。中間就係酒店的接駁船，左邊就係去Night Market的。

碼頭都幾多人，跟大隊響度等咗一陣。見唔見到寫住hotel shuttle 呢? 咁曬就梗係有船先走出去啦!

有船埋岸就要睇清楚係咪自己要坐的，呢架係去Peninsula，唔啱！

呢隻先啱呀！

終於上咗船～

拿！影返個碼頭俾大家睇

咁坐得船就梗係影下湄南河風光！如果想影相，坐呢D船影真係幾好，因為坐大船人多未必坐得到響船邊影相，而且大船開得比較快，難D影。

好多人都知，但如果你唔知的話，懶蟲順帶提兩句啦！湄南河仲有另一個名叫昭披耶河，係泰國最大的河流。泰國的白米大家一年都食唔少，有咁靚的白米要多謝佢呀～河流對耕作係好重要架（唔好話我知你唔知呢樣野），雖然依家有好多河道都已經填咗勒。有趣的地方係，湄南響泰文係解河流。譯咗做華文，大家就理所當然咁加個［河］字俾佢，但係湄南唔係佢個名黎！！！咁佢個名係咩？河河？呢個真係唔知勒～佢咁出名都唔洗特登俾個名佢啦～好似阿媽同你講落街市買餸你都唔會特登問係邊個啦～

響河上會不時見到呢D兩頭尖的長船，仲好七彩添，就泰國傳統的長尾船。呢D船多數都好似的士咁，可以點對點咁載你去目的地。咪睇佢好似咁大隻，懶蟲見親都係坐咗幾個人咁大罷。

呢架係去Night Market的Shuttle Boat，同水上巴士一樣，載超多人。其實我成日都懷疑會唔會沉...

經過Peninsula就差不多到啦。

遲咗少少所以急急腳咁行入去，沿路的餐廳都好多人食嘢。反而黎到Authors’Lounge又唔爆得曬，如果早Ｄ黎，Walk-in都應該有位。

官網：http://www.mandarinoriental.com/bangkok/fine-dining/authors-lounge/
下午茶時段：14:30 - 18:00
訂座電郵地址：mobkk-authorslounge@mohg.com

話說本來食唔到架啦，因為敗家仔訂位的時候Full 曬，點知後尾佢話呢一日有位，淨係呢日咋。咁我地梗係改行程黎就佢啦，所以第一日就黎hae黎嘆世界～

黎呢度梗係食Tea Set，有３款，Traditional, Thai, 同Vegetarian。試過上次兩個人叫兩個Set的慘劇之後，今次唔好貪心，淨係叫咗一個traditional set。特登影低個Menu，一黎俾大家參考下，二黎唔怕食完都唔知食咗咩

寫到呢度，要講下缺點，就係所謂Tea Set竟然係唔包飲品的。呢度的咖啡幾好飲，有肉桂棒，仲寫咗Authors’Lounge的Initial，好靚架，唔捨得飲。懶蟲特登搵返Ｄ舊相俾大家望下。而今次就叫咗兩壺茶，Oriental 同Darjeeling。

咖啡Menu影低咗，茶就無喇

上次坐響大廳，今次就坐響入面的細廳，靜靜哋。後黎黎咗香港人嘅一家大細就嘈啲，雖然阿爸阿媽勁叫Ｄ細路細聲Ｄ都係有ＤＤ失控。

之前食過呢個Tea的懶蟲純粹帶第一次黎的敗家仔朝聖下。嘢食係好食的，但係就算唔上驚為天人。懶蟲覺得最正的反而唔係嘢食，係環境。俾大家睇下相就知。

呢個Authors’Lounge官網直譯做作家翼，個名係為咗紀念曾踏入呢度的知名作家。而呢度係座落曼谷文華東方酒店的原址，全座建築最古老的地方就係佢，所以充滿英式殖民地色彩之餘又帶點泰國傳統特色。

因為聖誕節的關係，佢都應節擺返棵聖誕樹

佈置以白色為主，白色的藤椅碎花布，很有歐陸氣氛。

而牆上掛滿了不同的奬狀，飾櫃內亦是滿滿的獎座。

懶蟲還發現牆上有一幅寫滿簽名的裱畫，可是沒有一個是懶蟲認識的。

鐘意影相的朋友應該會很愛呢度，樓梯啦，梳化啦，高背通花椅啦，鋼琴啦，全部都係好靚的背景。不過懶蟲就無乜影啦，因為今次無著得靚靚黎影相～

呢度靜得黎又有D音樂襯託，有好寫意的感覺。雖然話香港半島的High Tea都係頂尖的，但係大堂太多人啦，又坐得比較迫，酒店High Tea的感覺所餘無幾。

好！終於到嘢食啦！餐具一樣以白色為主，以竹葉做點綴。旁邊個幾盒都係糖黎架，有砂糖‵方糖‵咖啡糖同健怡糖，照顧周到呀～

先黎雪葩，都幾酸，不過就好開胃勒。

仲有就係兩壺茶，都係用同一套餐具。

Tea Set三層，呢個係鬆餅層同埋Ｄ Cream同果醬，順時針，係士多啤梨，玫瑰同埋唔知咩梅（盡曬力，佢講咗兩次我都聽唔到

）。最鐘意玫瑰因為好香呀！

然後係甜品層。東南亞的口味偏甜，連平時係甜品痴的懶蟲都覺得有點太甜。真係麻麻地～

最後的鹹點層，例牌有件三文魚，有Ｄ火腿芝士。不過佢的配搭又有Ｄ怪，好似芝士上面的彩椒，靚係靚，但係懶蟲就覺得食落唔多夾。

黎個全家幅先，High Tea真係好開心~~~

唔爭在，post返2009年個陣去叫個兩個Set，俾大家比較下。其實個陣都係得兩個人，係咪諗起都飽呢？至於Thai Set好D定Traditional 英式好D，可能食慣英式，懶蟲都係鐘意佢多Ｄ。泰式個Ｄ甜椰椰的小食，唔係個個都啱。我就見對面個枱食淨咗唔少。不過如果你鐘意試新嘢的話，一試無妨。上次我哋都食曬架～