雪嶺流螢: 澳門喪食Trip @ 6-7 Aug 2011 (2)

６　Ａｕｇ　２０１１

Ａｆｔｅｒｎｏｏｎ：
幾經辛苦咁截到的士，立刻向第一站出發：富仕葡式美食
事前已經訂左位，舖頭的位置不在馬路邊，兜左陣先去到。舖頭唔大，有四五張枱。我地一坐低就好興奮咁點菜。等緊的時候當然就曬相機，拎出黎係咁影。不過點曬都好，莎姐部機一拎出黎都ｃｈａｍｐ曬，你睇下，相機大過塊面。
Pictures 957

好啦！終於有得食，指定動作當然是影相。但係專業的莎姐影相唔係一兩幅咁小兒科，大家梗係一於好少理，自己顧自己食嘢，佢有佢影，我地有我地食。

葡式炒蜆　＜－　唔錯，好耐無食過炒蜆啦
日式芥末燒羊胺　＜－　小妹唔食辣野，Ｗａｓａｂｉ注定唔係我杯茶
燒雞釀飯　＜－　餐牌係寫讓飯，隻雞圓碌碌，脹卜卜，好搞笑
鮮忌廉薯蓉焗馬介休　＜－　天使極力推介，果然係無得頂，但係人少少食的話會滯

身為香港人唔多唔少都會煲下劇，事實證明莎姐真係好少煲電視，劇集名錯曬，九唔搭八，好在我地天資聰敏聽得明。不過我諗要收返之前的香港人，應該係食飽飯響屋企無野做的香港人

話明呢次係喪食Ｔｒｉｐ，所以下一站依然係食：禮記雪糕
今次唔使同人爭的士，行得到，但係真係好熱，烈日當空

呢度的感覺好街坊，至少響裝修上面。不過Ｄ卡位勁窄，你要體諒我肥肉橫生先得架~
又係叫野食的時候，今次二比二，三文治雪糕對椰汁雪糕
Macau_Food2

雖然話呢度好街坊，但係其實佢有好多遊客光顧。當我地食緊個Ｄ溶得勁快的雪糕的時候，聽到隔離枱哥哥問乜野西班牙咖啡同夏威夷風情，哥仔，你唔好扮細喎，真係無聽過？

食飽係時候行下。循例都要去一去大三巴，去大三巴就會經過潘榮記。小ｇｌａ要買金錢餅。咦？呢站又係食野添...

即整即賣，好好食。伯伯彎住身咁整餅，前面有個拍照不要開閃光燈的告示牌。好食的唔單止係塊餅，仲有伯伯的熱誠。

終於到左人山人海的大三巴。純粹到此一遊，所以大家拍照留念就算，完全無意欲響曬到就黎脫水的情況下去行牌坊。 Pictures 994

去澳門唔買返一打半打杏仁餅返去做手信恐怕會被人罵到死無葬身之地。所以，講求效率的我地衝左入大三巴餅家，手起刀落買左十二盒杏仁餅，任務完成，無後顧之憂！每一間餅舖都有大量的杏仁餅試食，如果純粹想過口癮的話，黎行一轉就可以食到夠。不過，有Ｄ同胞真係需要再教育，試食食多幾塊就算啦，直情又食又拎，仲要嫌擺出黎得兩塊唔夠自己郁手拆，會唔會過份Ｄ？
Macau_Food

就在我們響大三巴度迫緊的時候，突然見到有人飲緊歇腳亭。大家有久旱逢甘露的興奮，即刻問響邊度？可惜姐姐仔聲稱好遠，買唔到 :(
惟有繼續行下街，影下相，乾蒸下。說時遲，那時快，攝影師莎姐正職是shoppaholic，所以又有收穫

響教堂打左個白鴿轉，之前經常都係過門而不入

大家都係為食鬼，所以又係諗食野的時候。出發去蒲京Ｂｏｏｋ位夜晚食自助山。成手都係杏仁餅，當然去先去cloak room 放低佢地。哇！排長龍，仲要等極都唔郁，就黎火都黎。行到呢個時候最想要兩樣野，就係冷氣同汽水，賭場就係唔使錢都可以滿足曬呢兩樣野的地方。但係世事就係咁，平日大把汽水等住拎，想飲的時候就兜極都無野飲。惟有水都照飲住先，點知轉個頭就發現有可樂，激死。大家真係無聊，響電梯都要自拍下。